ວິໄສທັດ
ສລຍ ພັດທະນາສັງຄົມສູ່ທິດຢືນຍົງ ດ້ວຍການສ້າງບຸກຄະລາກອນທີ່ມີຄຸນນະພາບສູງ
ພາລະກິດ
ສລຍ ປະກອບສ່ວນໃນການພັດທະນາຊັບພະຍາກອນມະນຸດທີ່ມີຄວາມອາດສາມາດສູງ, ເປັນເຈົ້າການຮ່ວມມື, ສົ່ງເສີມເຄືອຂ່າຍທາງດ້ານວິຊາການ ແລະ ທຸລະກິດໃນສັງຄົມ ລາວ ແລະ ສາກົນ
ຫຼັກການ
ຫ້າວຫັນ, ເຮັດວຽກເປັນໝູ່ຄະນະ , ມີຄວາມສາມະຄີ, ຮຽນຮູ້ – ປັບປຸງ ແລະ ພັດທະນາຕົນເອງຢ່າງຕໍ່ເນື່ອງ
ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ໄດ້ຮັບການສ້າງຕັ້ງຂຶ້ນໃນປີ 2001 ຢູ່ທີ່ມະຫາວິທະຍາໄລແຫ່ງຊາດ, ວິທະຍາເຂດດົງໂດກ ບົນພື້ນຖານການຮ່ວມມືລະຫວ່າງ ມະຫາວິທະຍາ ໄລແຫ່ງຊາດ ແລະ ອົງການ JICA. ໃນເດືອນພຶດສະພາ 2010 ໄດ້ຍົກລະດັບຂຶ້ນຈາກສູນລາວ-ຍີ່ປຸ່ນ (LJC) ມາເປັນ ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (LJI) ເຊິ່ງໄດ້ສືບຕໍ່ດໍາເນີນກິດຈະກໍາດ້ານການພັດທະນາຊັບພະຍາກອນມະນຸດເພື່ອຊ່ວຍໃຫ້ ສປປ ລາວ ຫຼຸດພົ້ນອອກຈາກປະເທດດ້ອຍພັດທະນາໃນປີ 2025. ດ້ວຍການສະໜັບສະໜຸນຂອງປະຊາຊົນທັງ 2 ຊາດ ລາວ-ຍີ່ປຸ່ນ, ສະຖາບັນ ລາວ-ຍີ່ປຸ່ນ ເປັນອົງການຈັດຕັ້ງໜຶ່ງທີ່ສໍາຄັນ ມີບົດບາດສູງໃນການເຊື່ອມສາຍສໍາພັັນຜ່ານການແລກປ່ຽນວັດທະນະທໍາ, ການພັດທະນາຊັບພະຍາກອນມະນຸດດ້ານການບໍລິຫານທຸລະກິດ ແລະ ການຮຽນພາສາຍີ່ປຸ່ນ.
ສະຖາບັນ ລາວ-ຍີ່ປຸ່ນ ໄດ້ສ້າງໂຄງການການຮ່ວມມືແລກປ່ຽນຊ່ຽວຊານ ລະຫວ່າງ 2 ລັດຖະບານ, ໂດຍມີຄູ່ຮ່ວມມື ຄື ອົງການ JICA ແລະ ມະຫາວິທະຍາໄລແຫ່ງຊາດ ເຊິ່ງມີເປົ້າໝາຍຄື:
1. ເພື່ອຊ່ວຍເຫຼືອການພັດທະນາຊັບພະຍາກອນມະນຸດ ໃນການສະໜັບສະໜຸນການພັດທະນາເສດຖະກິດຂອງ ສປປ ລາວ ໃຫ້ສາມາດແຂ່ງຂັນໃນຕະຫຼາດພາກພື້ນ ແລະ ສະໜັບສະໜຸນທຸລະກິດພາກເອກະຊົນຂອງລາວ ໃຫ້ເປັນທີ່ຍອມຮັບຂອງ ASEAN.
2. ເພື່ອຮັດແໜ້ນຄວາມສໍາພັນ ແລະ ການຮ່ວມມື ລະຫວ່າງປະຊາຊົນ 2 ຊາດ ລາວ-ຍີ່ປຸ່ນ
ນອກຈາກນີ້ເພື່ອເປັນການສົ່ງເສີມດ້ານວິຊາການ ສລຍ ກໍ່ໄດ້ມີຫອ້ງສະໝຸດ ເພື່ອໃຫ້ບໍລິການແກ່ນັກສຳມະນາກອນ ແລະ ນັກສຶກສາ ເຊິ່ງວ່າຫອ້ງສະໝຸດແມ່ນເນັ້ນການເປັນຫອ້ງສະໝຸດສະເພາະດ້ານການບໍລິຫານທຸລະກິດ ແລະ ພາສາຍີ່ປຸ່ນ ເຊິ່ງວ່າໃນປະຈຸບັນນີ້ມີປື້ມໄວ້ບໍລິການຫຼາຍກວ່າ.10,000 ເຫຼັ້ມ ແລະ ຍັງມີ ໜັງສືພິມ, ວາລະສານ, ຂໍ້ມູນຂອງມະຫາວິທະຍາໄລຈາກປະເທດຍີ່ປຸ່ນ, ບົດລາຍງານທັງພາຍໃນ ແລະ ຕ່າງປະເທດຈຳນວນໜຶ່ງໄວ້ບໍລິການ.
ວັນເວລາເປີດບໍລິການ ວັນຈັນ-ວັນສຸກ ເວລາ 8:30 – 16:00
ຂໍ້ມູນຕິດຕໍ່
ຫ້ອງການຕັ້ງຢູ່ ມະຫາວິທະຍາໄລແຫ່ງຊາດ, ວິທະຍາເຂດດົງໂດກ
ຕູ້ ປນ. 7322 ນະຄອນຫຼວງວຽງຈັນ.
ໂທລະສັບ＋856-21-720156, + 856-30-5210747
. ອີເມວ: japan.institute@gmail.com
ເວບໄຊສ://www.lji.edu.la
