ປະຫວັດຄວາມເປັນມາ
ຫໍສະໝຸດສະພາແຫ່ງຊາດ ໄດ້ສ້າງຕັ້ງຂຶ້ນໃນລະຫວ່າງ ປິ 1984-1988 ໄດ້ເຮັດໜ້າທີຈັດຕັ້ງຄຸ້ມຄອງຫ້ອງສະໝຸດ ແລະເກັບມ້ຽນ ສຳເນົາຂ່າວສານຂຶ້ນກັບກົມບໍລິຫານ ຂອງສຳນັກງານປະທານປະເທດ ແລະສະພາປະຊາຊົນສູງສຸດ ຊຸດທີ່ I, 1989-1990 ເປັນຫ້ອງສະໝຸຸດ ຂຶ້ນກັບກົມບໍລິຫານສະພາປະຊາຊົນສູງສຸດ ຊຸດທີ່ II, ໃນປີ 1993 ຂອງສະພາແຫ່ງຊາດ ຊຸດທີ່ III ໄດ້ຖືກແຕ່ງຕັ້ງເປັນພະແນກ ຫ້ອງສະໝຸດ ຂຶ້ນກັບກົມຄຸ້ມຄອງບໍລິຫານ ແລະການເງິນ, ໃນປີ 2000-2016 ພະແນກຫໍສະໝຸດ ໄດ້ຂຶ້ນກັບສູນຂ້ໍມູນ-ຂ່າວສານ ຂອງຫ້ອງວ່າການສະພາແຫ່ງຊາດ ແລະ ໃນເດືອນ 8/2016 ພະແນກ ຫໍສະໝຸດ ແລະ ພະແນກຂ້ໍມູນ-ຂ່າວສານ ໄດ້ຖືກຮ່ວມເຂົ້າກັນ ເປັນພະແນກຂ້ໍມູນ-ຂ່າວສານ ແລະຫ້ອງສະໝຸດ ຂຶ້ນກັບສູນຝຶກອົບຮົມ ແລະຂ້ໍມູນຂ່າວສານ ຂອງສະຖາບັນຄົ້ນຄວ້ານິຕິກຳສະພາແຫ່ງຊາດ ຈົນເຖິງປະຈຸບັນ.
ທີ່ຕັ້ງ, ພາລະບົດບາດ, ສິດ ແລະໜ້າທີ່ຂອງພະແນກຂ້ໍມູນ-ຂ່າວສານ ແລະ ຫໍສະໝຸດ
ອີງຕາມຂ້ໍຕົກລົງຂອງຄະນະເລຂາທິການສະພາແຫ່ງຊາດ ສະບັບເລກທີ່ 63/ຄລສ, ລົງວັນທີ່ 13/1/2022 ວ່າດ້ວຍການຈັດຕັ້ງ ແລະການເຄື່ອນໄຫວຂອງສູນຝຶກອົບຮົມ ແລະຂ້ໍມູນ-ຂ່າວສານ ມີທີ່ຕັ້ງ ແລະພາລະບົດບາດ ເປັນເສນາທິການໃຫ້ແກ່ສະຖາບັນຄົ້ນຄວ້ານິຕິກຳສະພາແຫ່ງຊາດທາງດ້ານວິຊາການໃນການຈັດຕັ້ງປະຕິບັດວຽກງານຝຶກອົບຮົມ, ສຳມະນາ, ການເກັບກຳ ແລະສະໜອງຂ້ໍມູນຂ່າວສານ.
ສຳລັບວຽກງານຫ້ອງສະໝຸດ ມີໜ້າທີດັ່ງນີ້:
- ຄຸ້ມຄອງ, ຈັດຫາ, ປົກປັກຮັກສາບັນດາວັດຖຸພັນ, ສິ່ງພີມ ແລະເອກະສານ ທີ່ມີຄຸນຄ່າຂອງຫໍສະໝຸດ.
- ຈັດໝວດໝູ່ປື້ມ, ແຍກປະເພດບັນດາປື້ມ, ບັນດາເອກະສານ,ສິ່ງພີມ ແລະບັນທຶກເຂົ້າ ໃນຖານຂ້ໍມູນເປັນລະບົບຕາມຫລັກການຂອງຫໍສະໝຸດ.
- ບໍລິການຢືມ-ສົ່ງ ແລະທວງຄືນ ບັນດາສິ່ງພີມຂອງຫໍສະໝຸດ.
- ສ້າງກິດຕະພາກຈາກວາລະສານ ແລະໜັງສືພີມ.
- ປະສານງານ, ຮ່ວມມືກັບພາກສ່ວນກ່ຽວຂ້ອງ ເພື່ອອຳນວຍຄວາມສະດວກໃນການເຄື່ອນໄຫວວຽກງານເກັບກຳ ແລະ ສະໜອງຂ້ໍມູນຂ່າວສານ ຕາມຄວາມຮັບຜິດຊອບ.
ການເຄື່ອນໄຫວວຽກງານຫໍສະໝຸດໃນໄລຍະຜ່ານມາ
ວຽກງານຫໍສະໝຸດເປັນວຽກງານໜຶ່ງທີ່ມີຄວາມສຳຄັນ ເປັນແຫຼ່ງລວບລວມຂ້ໍມູນ-ຂ່າວສານ, ຄວາມຮູ້ຕ່າງໆ ທີ່ເປັນບັນດາປື້ມປະເພດຕ່າງໆ, ວາລະສານ ແລະໜັງສືພີມ ເພື່ອໃຫ້ຜູ້ຊົມໃຊ້ຫໍສະໝຸດໄດ້ມີການບໍລິການ ແລະຈັດຢ່າງເປັນລະບົບເຊັ່ນ:
– ໄດ້ເອົາໃຈໃສ່ພັດທະນາ ແລະ ປັບປຸງວຽກງານຫໍສະໝຸດໃຫ້ເປັນລະບົບ ແລະຫັນເປັນທັນສະໄໝເທື່ອລະກ້າວ ໂດຍໄດ້ຍົກລະດັບຜູ້ຄຸ້ມຄອງຫໍສະໝຸດ, ໄດ້ສັບຊ້ອນບັນດາປື້ມ, ສິ່ງພີມຕ່າງໆ ເພື່ອໃຈ້ແຍກຫົວເລື່ອງ ທີ່ສາມາດລົງຢູ່ລະບົບຖານຂ້ໍມູນ ຄົ້ນຫາທາງລະບົບອີເລັກໂຕຼນິກ ແລະຈັດແຈງຫໍສະໝຸດຄືນໃໝ່ ໃຫ້ມີຄວາມຈົບງາມຂຶ້ນ.
– ເອົາໃຈໃສ່ເພີ່ມຈຳນວນປື້ມເຂົ້າຫໍສະໝຸດໃຫ້ຫລາຍກວ່າເກົ່າ ໂດຍໄດ້ຂໍການຊ່ວຍເຫລືອໃນການຈັດຊື້ຈຳນວນໜຶ່ງຈາກໂຄງການ, ຂໍຈາກສະພາແຫ່ງຊາດ ສສ.ຫວຽດນາມ, ອົງການຈັດຕັ້ງຕ່າງໆ ແລະການນຳມອບໃຫ້, ສຳລັບການຈັດຊື້ໜັງສືພີມ ແລະວາລະສານ ຈຳນວນໜຶ່ງແມ່ນງົບປະມານຂອງສະພາແຫ່ງຊາດ.
– ພ້ອມກັນນັ້ນຍັງເອົາໃຈໃສ່ຈັດເກັບບັນດາປື້ມ ແລະສິ່ງພີມ ໃຫ້ເປັນລະບົບມາດຕະຖານຂອງຫໍສະໝຸດ ແລະສະໜອງການຢືມ-ສົ່ງໃຫ້ການນຳ, ພະນັກງານສະພາແຫ່ງຊາດ ແລະພາກສ່ວນທາງນອກ ໃຫ້ເປັນປົກກະຕິ ເຮັດໃຫ້ຜູ້ນຳໃຊ້ຫໍສະໝຸດ ມີຈຳນວນເພີ່ມຂຶ້ນ ໃນແຕ່ລະປີ ຊຶ່ງໃນປີ 2012 ຫໍສະໝຸດສະພາແຫ່ງຊາດ ໄດ້ເຂົ້າເປັນສະມາຊິກຂອງຫໍສະໝຸດກາງ ຫລືຫໍສະໝຸດຂອງມະຫາວິທະຍາໄລແຫ່ງຊາດ ໄດ້ນຳໃຊ້ຖານຂ້ໍມູນ PMB ໃນການບັນທຶກ ແລະເກັບກຳຮັກສາຂ້ໍມູນປື້ມ.
ນອກຈາກນີ້, ໃນປີ 2015 ໄດ້ຂຶ້ນແຜນຈັດຊື້ປື້ມພາສາລາວ, ໄທ, ແລະອັງກິດຈຳນວນ 246 ຫົວ ປະກອບໃຫ້ຫໍສະໝຸດສະພາແຫ່ງຊາດ ແລະເຂດເລືອກຕັ້ງຈຳນວນໜຶ່ງ ໂດຍໃຊ້ງົບປະມານຊ່ວຍເຫລືອລ້າ. ຊຶ່ງປະຈຸບັນຫໍສະໝຸດສະພາແຫ່ງຊາດ ມີປື້ມທັງໝົດປະມານ 8.551 ຫົວ ຄື:
- ປື້ມພາສາລາວ 1.783 ຫົວ
- ປື້ມພາສາຫວຽດນາມ 1.898 ຫົວ
- ປື້ມພາສາອັງກິດ 2.646 ຫົວ
- ປື້ມພາສາໄທ 437 ຫົວ
- ປື້ມພາສາຝຣັ່ງ 282 ຫົວ
- ວາລະສານ 29 ປະເພດ
- ໜັງສືພີມ 16 ປະເພດ
- ປື້ມປະມວນປະຫວັດ ສສຊ, ການເລືອກຕັ້ງ ແລະກອງປະຊຸມສະພາແຫ່ງຊາດ
- ປື້ມກິດຕະພາກ.
ໃນປີ 2014-2016 ວຽກງານຫໍສະໝຸດ ໄດ້ສຳເລັດການຝຶກອົບຮົມ ແລະ ຈັດຫ້ອງອ່ານ ພ້ອມດ້ວຍອຸປະກອນຄອມພີວເຕີ, ເຄື່ອງພີມ, ຕູ້ ແລະຖານໃສ່ປື້ມ ແລະໜັງສືພີມໃຫ້ບັນດາເຂດເລືອກຕັ້ງ 3 ເຂດເລືອກຕັ້ງຄື: ແຂວງຫລວງນໍ້າທາ, ແຂວງບໍລິຄຳໄຊ ແລະແຂວງສະຫວັນນະເຂດ ໂດຍນຳໃຊ້ງົບປະມານຂອງອົງການຢູນິເຊບ ແລະ 1 ຄັ້ງ ຢູ່ແຂວງວຽງຈັນ ໂດຍນຳໃຊ້ງົບປະມານຂອງຫ້ອງວ່າການສະພາແຫ່ງຊາດ.
ໃນ 2016-2020 ສຳລັບວຽກງານຫໍສະໝຸດ ໄດ້ເຄື່ອນໄຫວຕາມພາລະບົດບາດ ແລະໜ້າທີ່ ທີ່ໄດ້ກຳນົດໄວ້ໃນຂ້ໍຕົກລົງຂອງສູນຝຶກອົບຮົມ ແລະ ຂ້ໍມູນຂ່າວສານໄດ້ເປັນຢ່າງດີ, ນອກຈາກນັ້ນຍັງໄດ້ເຂົ້າຮ່ວມໃນຄະນະສູນ ແລະຄະນະສະຖາບັນ ລົງຕິດຕາມ ແລະຊຸກຍູ້ບັນດາເຂດເລືອກຕັ້ງຕ່າງໆ 18 ເຂດເລືອກຕັ້ງ ໃນການເກັບກຳ, ສະໜອງຂ້ໍມູນ ແລະ ຫ້ອງອ່ານໃຫ້ແກ່ວິຊາການທີ່ຮັບຜິດຊອບວຽກງານການສະໜອງຂ້ໍມູນ ແລະຫ້ອງສະໝຸດ ຈຳນວນ 12 ຄັ້ງ ແລະໄດ້ສຳເລັດການຈັດຝຶກອົບຮົມວຽກງານດັ່ງກ່າວ ໃຫ້ວິຊາການຢູ່ບັນດາແຂວງພາກເໜືອ ຢູ່ແຂວງໄຊຍະບູລີ ຈຳນວນ 1 ຄັ້ງ.
ແຜນການພັດທະນາວຽກງານຫໍສະໝຸດ
- ຂຶ້ນແຜນຈັດຊື້ປື້ມເຂົ້າຫໍສະໝຸດ ໃຫ້ຫລາຍຂຶ້ນທາງດ້ານຈຳນວນ ແລະມີເນື້ອໃນຕິດພັນກັບການເຮັດໜ້າທີ່ການເມືອງຂອງ ສສຊ ເພື່ອກະຕຸກຊຸກຍູ້ໃຫ້ມີຜູ້ອ່ານເພີ່ມຂຶ້ນ.
- ລົງເກັບກຳຂ້ໍມູນ ແລະຊຸກຍູ້ໃຫ້ມີຫ້ອງອ່ານຢູ່ບັນດາເຂດເລືອກຕັ້ງ ເພື່ອເປັນບ່ອນຄົ້ນຄວ້າ ແລະສະໜອງຂ້ໍມູນໃຫ້ບັນດາ ສສຊ, ສະມາຊິກ ສພຂ ແລະວິຊາການພາຍໃນ ສພຂ ແລະ ພາກສ່ວນຕ່າງໆ ໄດ້ເຂົ້າຊົມໃຊ້.
- ສືບຕໍ່ປັບປຸງ ແລະ ພັດທະນາຖານຂ້ໍມູນຂອງຫໍສະໜຸດໃຫ້ທັນສະໄໝຂຶ້ນກວ່າເກົ່າ.
- ສືບຕໍ່ຂຶ້ນແຜນການ ຈັດກອງປະຊຸມຝືກອົບຮົມ ແລະຈັດຫ້ອງອ່ານ ໃຫ້ພະນັກງານ ຢູ່ບັນດາເຂດເລືອກຕັ້ງ ທີ່ຍັງບໍ່ໄດ້ເຂົ້າຮ່ວມ.
- ເອົາໃຈໃສ່ກໍ່ສ້າງພະນັກງານວິຊາການ ຜູ້ຮັບຜິດຊອບວຽກງານຫໍສະໝຸດຂອງສະພາແຫ່ງຊາດ ແລະເຂດເລືອກຕັ້ງ ເພື່ອໃຫ້ມີຄວາມສຳນານງານຫລາຍຂຶ້ນ ໃນການປະຕິບັດໜ້າທີ່ຂອງຕົນ ດ້ວຍການຈັດຕັ້ງຝຶກອົບຮົມໄລຍະສັ້ນຢູ່ພາຍໃນປະເທດ.
- ເອົາໃຈໃສ່ປະສານງານກັບບັນດາຫໍສະໝຸດ ຢູ່ພາຍໃນປະເທດ ແລະ ຕ່າງປະເທດ ເພື່ອແລກ ປ່ຽນບົດຮຽນທາງດ້ານຂ້ໍມູນ ທີ່ມີຄວາມຕ້ອງການໃນໄລຍະໃໝ່.
ພາບບັນຍາກາດພາຍໃນຫໍສະໝຸດສະພາແຫ່ງຊາດ
