ໃນຕອນເຊົ້າວັນທີ 4 ມີນາ 2021 ນີ້, ຄະນະອັກສອນສາດ(ຄອສ) ມະຫາວິທະຍາໄລແຫ່ງຊາດ(ມຊ) ຮ່ວມກັບ ບໍລິສັດ monument books ຜູ້ນຳເຂົ້າ ແລະຈັດຈໍາຫນ່າຍປື້ມຈາກຕ່າງປະເທດ ແລະຮ້ານປື້ມດີບຸກ ພ້ອມດ້ວຍຫ້າງຮ້ານຕ່າງໆ ໄດ້ຈັດງານເທສະການປື້ມອ່ານ Book Festival 2021 ທີ່ສະໂມສອນໃຫຍ່ ມຊ, ໂດຍການເຂົ້າຮ່ວມຂອງທ່ານ ປອ. ນາງ ທອງມາລາ ໂພສີຄຳ ຮອງຄະນະບໍດີ ຄອສ, ທ່ານ ສົມໄໝ ພົມມະຈັນ ຜູ້ຈັດງານ-ຜູ້ຈັດການການຮ້ານປື້ມດີບຸກ, ມີຜູ້ຕາງຫນ້າຈາກຫ້າງຮ້ານ ບໍລິສັດຕ່າງໆ, ແຂກຖືກເຊີນ, ພະນັກງານ, ຄູ-ອາຈານ ແລະນັກສຶກສາ ມຊ ເຂົ້າຮ່ວມ.
ໃນໂອກາດນີ້, ທ່ານ ສົມໄໝ ພົມມະຈັນ ໄດ້ກ່າວເຖິງຈຸດປະສົງ ແລະປະຫວັດຄວາມເປັນມາຂອງການຈັດງານວ່າ: ການຈັດງານເທສະການປື້ມອ່ານໃນຄັ້ງນີ້ ເປັນການສົ່ງເສີມການອ່ານໃຫ້ກັບຜູ້ທີ່ມີໃຈມັກຮັກໃນການອ່ານ ເຊິ່ງງານດັ່ງກ່າວ ໄດ້ນຳເອົາປື້ມຫຼາກຫຼາຍແບບມາວາງສະແດງ ແລະຈຳຫນ່າຍພາຍໃນງານ; ການອ່ານແມ່ນເປັນການຊ່ວຍສ້າງແນວຄວາມຄິດ ເປີດກວ້າງຈິນຕະນາການ ແລະແຮງບັນດານໃຈ ເຮັດໃຫ້ຜູ້ອ່ານສາມາດສ້າງສັນຜົນງານທີ່ມີຄຸນນະພາບໃນການເຮັດວຽກ ແລະເປັນຄົນດີຂອງສັງຄົມ. ການຈັດງານຄັ້ງນີ້ແມ່ນໄດ້ຮັບການຮ່ວມມືຈາກຫຼາຍພາກສ່ວນ ເປັນຕົ້ນແມ່ນ ຄອສ, ມຊ, ຮ້ານປື້ມດີບຸກ, ບໍລິສັດ monument books ຜູ້ນຳເຂົ້າ ແລະຈັດຈຳໜ່າຍປື້ມຈາກຕ່າງປະເທດ ແລະອີກຫຼາຍໆພາກສ່ວນ ທີ່ໃຫ້ການຮ່ວມມືເພື່ອຈັດງານດັ່ງກ່າວຂຶ້ນ, ນອກນັ້ນ ພາຍໃນຍັງມີກິດຈະກຳ ແລະເກມຫຼິ້ນຕ່າງໆທີ່ຫຼາກຫຼາຍເພື່ອໃຫ້ຜູ້ເຂົ້າຮ່ວມໄດ້ລຸ້ນລາງວັນໄປພ້ອມ. ທີ່ສຳຄັນພາຍໃນງານຜູ້ເຂົ້າຮ່ວມຍັງໄດ້ຮັບຟັງການເສວະນາ ໃນຫົວຂໍ້ຕ່າງໆ ຈາກນັກວິທະຍາກອນຮັບເຊີນພິເສດ ທີ່ມີປະສົບການກວ້າງຂວາງເຊັ່ນ: ຫົວຂໍ້ ” ການອ່ານຄືຮາກຖານຂອງຊີວິດ” ໂດຍທ່ານ ນາງ ມາລາວົງ ພົມມະວົງ, ຫົວຂໍ້ “ການອ່ານ ການຂຽນ ແລະການຮຽນຮູ້ສູ່ຜົນສຳເລັດ” ໂດຍ ພຣະ ອາຈານ ໄພວັນ ມາລາວົງ ທ່ານ ສັກໄຊ ແສງອາລຸນ, ຫົວຂໍ້ “ວັດຈະນານຸກົມສຳນວນລາວ” ໂດຍ ພຣະ ອາຈານ ບຸນທະວີ ກົມພະພັນ ແລະອື່ນໆ ເຊິ່ງງານດັ່ງກ່າວໄດ້ຈັດຂຶ້ນໃນລະຫວ່າງວັນທີ 4-6 ມີນາ 2021 ນີ້ ທີ່ສະໂມສອນໃຫຍ່ ມຊ.
