ຫ້ອງສະໝຸດຄະນະສຶກສາສາດ ຕັ້ງຢູ່ວິທະຍາເຂດດົງໂດກ ຂອງມະຫາວິທະຍາໄລແຫ່ງຊາດ ຕັ້ງຢູ່ຕຶກສຳນັກຄະນະບໍດີ ຄະນະສຶກສາສາດ ຊັ້ນ II ທິດເໜືອຕິດກັບຕຶກສຳນັກງານອະທິການບໍດີ ມະຫາວິທະຍາໄລແຫ່ງຊາດ, ທິດໃຕ້ຕິດກັບຄະນະວິທະຍາສາດທໍາມະຊາດ, ທິດຕາເວັນອອກຕິດກັບສະໂມສອນໃຫຍ່ ມະຫາວິທະຍາໄລແຫ່ງຊາດ, ທິດຕາເວັນຕົກຕິດກັບຄະນະເສດຖະສາດ ແລະ ບໍລິຫານທຸລະກິດ. ມີຄວາມສະຫງົບເໝາະສົມແກ່ການໃຊ້ບໍລິການອ່ານຂອງນັກຮຽນ-ນັກສຶກສາ ຕະຫຼອດຮອດຄູ-ອາຈານທົ່ວໄປ.
- ພາລະບົດບາດຂອງຫ້ອງສະໝຸດຄະນະສຶກສາສາດ
ຫ້ອງສະໝຸດຄະນະສຶກສາສາດຂຶ້ນກັບພະແນກບໍລິຫານວິຊາການ ມີບົດບາດສໍາຄັນໃນການຈັດຕັ້ງຄຸ້ມຄອງ, ບູລະນະຮັກສາ ແລະ ໃຫ້ບໍລິການປື້ມ, ຕໍາລາຮຽນ ເພື່ອສົ່ງເສີມການຮຽນ-ການສອນ ການສຶກສາຄົ້ນຄວ້າວິໄຈຂອງຄູ-ອາຈານ, ບຸກຄະລາກອນ ແລະ ນັກສຶກສາທີ່ສຶກສາຢູ່ໃນຄະນະສຶກສາສາດຖືໄດ້ວ່າເປັນແຫຼ່ງຂ່າວສານທີ່ມີບົດບາດສໍາຄັນຕໍ່ການພັດທະນາຊັບພະຍາກອນເປັນຢ່າງຍິ່ງ.
- ຫ້ອງສະໝຸດຄະນະສຶກສາສາດມີໜ້າທີ່ດັ່ງນີ້:
– ຄຸ້ມຄອງຊັບສິນທີ່ຢູ່ໃນຄວາມຮັບຜິດຊອບຂອງຫ້ອງສະໝຸດ ຄະນະສຶກສາສາດ ຕາມການກໍານົດຂອງມະຫາວິທະຍາໄລແຫ່ງຊາດ.
– ຄົ້ນຄວ້າ, ເກັບກໍາ, ຮີບໂຮມ ແລະ ປົກປັກຮັກສາບັນດາສື່ຄວາມຮູ້ທີ່ເປັນສິ່ງພິມ.
– ຈັດບໍາລຸງ, ສໍາມະນາ, ຍົກລະດັບຄວາມຮູ້ຄວາມສາມາດທາງດ້ານວິຊາການຫ້ອງສະໝຸດ ແລະ ການຈັດເກັບຂໍ້ມູນຂ່າວສານ.
– ຮີບໂຮມຜົນງານການຂີດຂຽນຂອງຄູອາຈານ, ບົດໂຄງການຈົບຊັ້ນຂອງນັກສຶກສາ.
– ຊອກແຫຼ່ງທຶນເພື່ອປັບປຸງປື້ມ ແລະ ເອກະສານຕ່າງໆ ດ້ວຍຫຼາຍຮູບແບບຕ່າງກັນ ເພື່ອໃຫ້ມີປື້ມ, ເອກະສານ, ຕໍາລາການຮຽນ-ການສອນ ແລະ ການຄົ້ນຄວ້າເຂົ້າໃນຫ້ອງສະໝຸດ.
– ເກັບກໍາຂໍ້ມູນປື້ມ, ເອກະສານຕ່າງໆດ້ວຍລະບົບຄອມພິວເຕີເພື່ອສະດວກໃນການຢືມເອກະສານ.
– ປະຕິບັດໜ້າທີ່ອື່ນໆຕາມການມອບໝາຍຂອງຂັ້ນເທິງ.
ໂຄງຮ່າງການຈັດຕັ້ງ
ພາບບັນຍາກາດພາຍໃນຫ້ອງສະໝຸດ
