1.ປະຫວັດຄວາມເປັນມາ
ຫໍສະໝຸດສະຖາບັນການທະນາຄານ ໄດ້ຮັບການສ້າງຕັ້ງຂຶ້ນພ້ອມໆກັບການຂະຫຍາຍຕົວຂອງວິທະຍາໄລການທະນາຄານໃນປີ 2004 ເຊ່ິ່ງໃນເບື້ອງຕົ້ນມີປື້ມ ປະມານ 4.000 ກວ່າຫົວ, ມີພະນັກງານປະຈຳ 01 ທ່ານ. ການຄຸ້ມຄອງບໍລິຫານຂໍ້ມູນຂ່າວສານເຮັດແບບປະຖົມປະຖານໃນຮູບແບບການຈົດກ່າຍດ້ວຍມື, ພະນັກງານຮັບຜິດຊອບວຽກງານຫໍສະໝຸດຍັງຂາດປະສົບການດ້ານວຽກງານຫໍສະໝຸດມາກ່ອນ ແລະ ຮັບຜິດຊອບຫຼາຍໜ້າວຽກໄປພ້ອມກັນ.
ໃນປີ 2005 ວິທະຍາໄລການທະນາຄານໄດ້ກ້າວຂຶ້ນເປັນ “ສະຖາບັນການທະນາຄານ”; ຈົນມາເຖິງປີ 2007 ວຽກງານຫໍສະໝຸດໄດ້ມີການປັບປຸງ ແລະພັດທະນາຕາມຫຼັກການວິຊາການຫໍສະໝຸດເຊິ່ງໄດ້ມີການຈັດຝຶກອົບຮົມວິຊາການບັນນາຮັກໃຫ້ແກ່ພະນັກງານທີ່ຮັບຜິດຊອບວຽກຫໍສະໝຸດ ແລະ ຈັດຊື້-ຈັດຫາອຸປະກອນຊັບພະຍາກອນປຶ້ມ ແລະ ອື່ນໆເຂົ້າຫໍສະໝຸດຢ່າງຕໍ່ເນື່ອງ. ມີການບໍລິຫານ, ຄຸ້ມຄອງຂໍ້ມູນຂ່າວສານຢ່າງເປັນລະບົບຕາມຫຼັກການບັນນາຮັກ, ເຊິ່ງສາມາດນຳໃຊ້ອຸປະກອນທັນສະໄໝເຂົ້າໃນການຄຸ້ມຄອງ, ບໍລິຫານ ແລະ ການບໍລິການຂໍ້ມູນຂ່າວສານດ້ວຍລະບົບຖານຂໍ້ມູນ (ໂປຼແກຼມ PMB) ເລີ່ມແຕ່ປີ 2008 ເປັນຕົ້ນມາ.
ຫໍສະໝຸດສະຖາບັນການທະນາຄານ ໄດ້ເຂົ້າເປັນສະມາຊິກຂອງສະມາຄົມຫໍສະໝຸດລາວ (LALIC) ໃນປີ 2008, ບັນດາສະມາຊິກແມ່ນໃຊ້ລະບົບຖານຂໍ້ມູນດຽວກັນຄືຖານຂໍ້ມູນໂປຼແກຼມ PMB, ທຸກໆປີແມ່ນໄດ້ມີການຈັດປະຊຸມຮ່ວມກັນເພື່ອໃຫ້ບັນດາສະມາຊິກສະມາຄົມຫໍສະໝຸດລາວ ໄດ້ແລກປ່ຽນຖອດຖອນບົດຮຽນຮ່ວມກັນ, ທາງດ້ານການບໍລິຫານ, ການຄຸ້ມຄອງ, ການຈັດການ, ການນຳໃຊ້ລະບົບຖານຂໍ້ມູນໂປແກຼມ PMB ແລະ ການໃຫ້ບໍລິການຕ່າງໆຂອງຫໍສະໝຸດດ້ວຍກັນ.
ຮອດຕົ້ນປີ 2012 ພາຍຫຼັງຫໍສະໝຸດໄດ້ຍ້າຍຈາກຕຶກເກົ່າ (ຕຶກA) ມາຢູ່ຮ່ວມກັບອາຄານຫຼັງໃໝ່ເອີ້ນວ່າ: “ຕຶກສະໂມສອນ, ຫໍສະໝຸດ ແລະ ທະນາຄານຈຳລອງ” ການສ້າງຫໍສະໝຸດແມ່ນການຊ່ວຍເຫຼືອລ້າຈາກໂຄງການລຸກຊໍາບວກ (Lao-Lux 016), ໃນນັ້ນຫໍສະໝຸດປະກອບມີຫ້ອງອ່ານຂະໜາດໃຫ່ຍ, ຫ້ອງໂສດທັດສະນະວັດຖຸ ແລະ ຫ້ອງອິນເຕີເນັດ. ຊັບພະຍາກອນທີ່ນຳໃຊ້ມີປຶ້ມຕຳລາ, ປຶ້ມອ່ານທົ່ວໄປ, ສິ່ງພິມຕ່າງໆ, ເຄື່ອງຄອມພິວເຕີ, ຊັ້ນຕູ້ວາງປຶ້ມ, ໂຕະຕັ່ງ, ໂທລະພາບ ແລະ ເຄື່ອງອ່ານແຜ່ນ CD, DVD ເພື່ອອໍານວຍຄວາມສະດວກໃຫ້ແກ່ການບໍລິການ. ນອກນັ້ນ ສະຖາບັນການທະນາຄານ ໄດ້ຂຶ້ນແຜນການຂົນຂວາຍຊັບພະຍາກອນປຶ້ມເຂົ້າຫໍສະໝຸດໃນແຕ່ລະປີເຊັ່ນ: ປຶ້ມອ່ານທົ່ວໄປທີ່ເປັນພາສາລາວ ແລະ ພາສາຕ່າງປະເທດ, ປຶ້ມຕຳລາວິຊາການ, ບົດໂຄງການຈົບຊັ້ນຂອງນັກສຶກສາ, ບົດວິທະຍານິພົນ, ວາລະສານ, ໜັງສືພິມ…, ມີການວິເຄາະປຶ້ມຖືກຕ້ອງຕາມຫຼັກວິຊາການບັນນາຮັກກ່ອນນຳປຶ້ມອອກໃຫ້ບໍລິການ, ຫໍສະໝຸດໄດ້ນຳໃຊ້ລະບົບປະຕູນິລະໄພເພື່ອຄຸ້ມຄອງຊັບພະຍາກອນໃຫ້ມີຄວາມປອດໄພ.
ສະຖາບັນການທະນາຄານໄດ້ເອົາໃຈໃສ່ໃຫ້ຄວາມສຳຄັນໃນການພັດທະນາບຸກຄະລາກອນພາຍໃນຫໍສະໝຸດ ໄດ້ສົ່ງພະນັກງານໄປຍົກລະດັບຄວາມຮູ້ທາງດ້ານວິຊາການຫໍສະໝຸດ, ແລກປ່ຽນຖອດຖອນບົດຮຽນທັງພາຍໃນ ແລະ ຕ່າງປະເທດເຊັ່ນ: ຫໍສະໝຸດແຫ່ງຊາດລາວ, ຫໍສະໝຸດກາງ ມຊ, ຫໍສະໝຸດມະຫາວິທະຍາໄລ ສຸພານຸວົງ, ຫໍສະໝຸດມະຫາວິທະຍາໄລມະຫາສາລະຄາມ, ຫໍສະໝຸດມະຫາ ວິທະຍາໄລຊຽງໃໝ່, ຫໍສະໝຸດມະຫາວິທະຍາໄລບູລະພາ ປະເທດໄທ, ເພື່ອນໍາເອົາຄວາມຮູ້ມາພັດທະນາຫໍສະໝຸດສະຖາບັນການທະນາຄານ ໃຫ້ມີຄວາມທັນສະໄໝ ແລະ ໃຫ້ມີຄວາມເປັນເອກະພາບຖືກຕ້ອງຕາມຫຼັກວິຊາການຄືກັນກັບຫໍສະໝຸດອື່ນໆ, ປັດຈຸບັນປະກອບມີບຸກຄະລາກອນຫໍສະໝຸດທັງໝົດ 04 ທ່ານ, ພາຍໃຕ້ການຊີ້ນໍາຂອງຫົວໜ້າສູນຝຶກອົບຮົມ ແລະ ຄົ້ນຄວ້າວິທະຍາສາດ, ມີຊັບພະຍາກອນຫໍສະໝຸດທີ່ມີໃນຖານຂໍ້ມູນ PMB ໄວ້ໃຫ້ບໍລິການຈຳນວນ 20,418 ຫົວ.
ເພື່ອອຳນວຍຄວາມສະດວກໃນການຄົ້ນຄວ້າວິທະຍາສາດຂອງຄູອາຈານ ແລະ ການສຶກສາຮ່ຳຮຽນຂອງນັກສຶກສາ, ມາຮອດປີ 2017 ສະຖາບັນການທະນາຄານ ໄດ້ມີພິທີເຊັນສັນຍາການຮ່ວມມື (MOU) ຮ່ວມກັບ ສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຼນິກ ໃນການສ້າງປຶ້ມແບບເອເລັກໂຕຼນິກ ຫຼື E-Book ເຊິ່ງເປັນຫໍສະໝຸດແຫ່ງທໍາອິດໃນ ສປປ ລາວ ທີ່ໄດ້ລິເລີ່ມໃນການສ້າງລະບົບ E-Book ແລະ ໄດ້ດໍາເນີນການສ້າງສໍາເລັດຢ່າງເປັນຮູບປະທໍາ ພ້ອມຕິດຕັ້ງລະບົບທົດລອງການນຳໃຊ້ໃນກາງປີ 2018 ຖານຂໍ້ມູນປະກອບມີປຶ້ມແບບຮຽນຂອງສະຖາບັນການທະນາຄານ ແລະ ປຶ້ມບົດໂຄງການຈົບຊັ້ນປະລິນຍາຕີຂອງນັກສຶກສາສົກປີ 2012-2016 ໃນອະນາຄົດຫໍສະໝຸດສະຖາບັນການທະນາຄານ ກໍ່ມີແຜນສືບຕໍ່ພັດທະນາໃຫ້ກາຍເປັນຫໍສະໝຸດທີ່ມີຄວາມທັນສະໄໝຍິ່ງຂຶ້ນສົມຄູ່ກັບຄວາມໄວ້ເນື້ອເຊື່ອໃຈຈາກຜູ້ໃຊ້ບໍລິການ.
2. ຂໍ້ມູນຂອງພະນັກງານທີ່ປະຈຳການຢູ່ຫໍສະໝຸດ
| ລດ | ຊື່ ແລະ ນາມສະກຸນ | ທີ່ຢູ່ | ເບີໂທ | ອີເມວ |
| 1. | ທ່ານ ນ ສຸກນະພາ ເນດທອງສະຫວັນ | ບ້ານ ໜອງວຽງຄຳ | 020 2980 6698 | Souknaphan01@gmail.com |
| 2. | ທ່ານ ນ ສວນມະນີ ວັນທອງທິບ | ບ້ານ ໜອງວຽງຄຳ | 020 29805746 | Souanmany99@gmail.com |
| 3 | ທ່ານ ນ ສຸທາລິດ ຫອມສີສົມບັດ | ບ້ານດອນຕິ້ວ | 020 22007844 | Southalith99@gmail.com |
| 4 | ທ່ານ ນ ມີນາ ແພງຄຳມີ | ບ້ານຫາດຊາຍຂາວ | 020 59559696 | Pickmeena@gmail.com |
